Der Brunneputzer

D Grächtigkeit uf em Brunne a der Grächtigkeitsgass unger het ne geng chli dduuret. Wäge de verbungene Ouge. Si het ja nid esmal gseh, ob d Sunne schynt. Aber derfür het si o di meh oder weniger schynheilige Gsichter vo dene nid müessen aaluege, wo da zu ihrne Füess ufegspanyflet hei: Der Papscht mit emne unghüür hochnäsige Gsicht u schynbar fescht dervo überzügt, mit syr drüfache Chrone chöm är de ganz sicher i Himu.