Hiimwäga

We ma elter würt, wiis ma gääre, waa ma dehiimen ischt. Ischt nät ds Läbe wien ä lengi u faarbigi Wanderig, dur fruchtbari Gägeti u trocheni Wüeschteni. U ds Aalter ischt wien ä Hiimwääg, wie we ma van ere lenge Riiss zruggchunnt. Aber ds Hütti, waat mit der hiimtriischt, ischt volls van Erinnerige u Gschichte, waat gäären oppa iis epperem erzellscht, vilicht am Aabe am offene Füür, wes ussenaha strubusset, schnyt u chaalt ischt. U jedi erzellti Gschicht söllti d Härze van de Zuehörerine un Zuehörer es bitzi erwäärme u ds Gmüet um nes Ideeli erhele. We mynner Gschichten das bhuute, de hetten ig erreicht, was ig mer vorgnoh ha. U ds Hütti hetti mer grad toll gliechtet.